Skessuhorn:

Boðað til þjóðfundar Vestlendinga

9. febrúar 2010

Fjórði þjóðfundurinn af átta, sem haldnir eru í landshlutunum, verður haldinn í Menntaskóla Borgarfjarðar í Borgarnesi laugardaginn 20. febrúar næstkomandi. Fyrsti fundurinn í þessari fundaröð var fyrir Austurland á Egilsstöðum en Vestfirðingar funduðu síðan á laugardag á Ísafirði og laugardaginn 13. febrúar er þjóðfundur fyrir Norðvesturland á Sauðárkróki. Samtök sveitarfélaga á Vesturlandi sjá um undirbúning fundarins ásamt verkefnisstjórn Sóknaráætlunar 20/20.  Hrefna B. Jónsdóttir framkvæmdastjóri SSV segir að ákveðinn hópur sé handvalinn og þar komi til forstöðumenn ýmissa opinberra stofnana á Vesturlandi. Síðan sé handahófskennt úrtak Vestlendinga úr þjóðskrá valið á fundinn.

Hrefna segir að boð á fundinn ættu að berast til fólks þessa dagana og mikilvægt sé að fólk tilkynni um hvort það ætli að mæta. “Við þurfum að ná hundrað manna fundi og þessi fundur er undirbúinn mjög ítarlega. Borðstjórar koma frá ráðuneyti og þeir setja sig í samband við þá sem tilkynna mætingu. Þannig verður fólk undirbúið vel fyrir fundinn og veit því að hverju það gengur,” segir Hrefna.

Að loknum fundinum í Borgarnesi funda íbúar á Norðausturlandi á Akureyri 27. febrúar, Sunnlendingar funda laugardaginn 6. mars á Selfossi, Suðurnesjamenn 13. mars í Reykjanesbæ og fundaröðinni lýkur svo með fundi höfuðborgarbúa í Reykjavík 20. mars.